Monday, March 20, 2017

सहरसा मे भेटल ISIS क' पोस्टर

सहरसा : मिथिला क्षेत्र क' सहरसा क' नवहट्टा मे आईएसआईएस सं संबंधित किछु पोस्टर भेटल अछि, न्यूज़ एजेंसी एएनआई क' मानी त' पोस्टर पर लोक सभकें, खास क' युवा वर्ग के आईएसआईएस सं जुड़बाक अपील कयल गेल अछि.



एहि मामिला मे एसडीपीओ अनवर जावेद ने कहलनि जे, "ISIS क' पोस्टर लागब बड्ड गंभीर मुद्दा अछि, जे कियो इ केलक ओकर तकबाक काज शुरू भ' गेल अछि, जांच चलि रहल अछि."


Tuesday, March 7, 2017

नहि डंफाक थाप आ नहिये पारंपरिक गीत : बिलाइत फगुआ

डेस्क : ओना त' जीवन मे उत्साह बढ़ेबाक लेल उत्सव क' आयोजन होइत अछि मुदा फगुआ आन पावनि सं कनिक फाजिले उत्साह क' संचार करैत अछि. इ मात्रे टा एहन पावनि अछि जाहि मे नहिये टा वर्गक विभेद मिटैत अछि संगे उमेरक दायरा सेहो सिमटा जाइत अछि. एहि पावनिक सभसं महत्वपूर्ण कड़ी गायन अछि. मिथिला मे एकर बड्ड पुरान परंपरा रहल अछि. एकर महत्व के ऐना बुझल जा सकैत अछि जे वसंत पंचमी क' दिन सं फाग गायब शुरू भ' जाइत अछि. मां सरस्वती कें अबीर अर्पित क' अबीर उड़य लगैत अछि.


आधुनिकताक बयार आ रोजगारक अवसर नहि रहबाक कारणे सून पड़ल गाम मे आब डंफा क' थाप स्वर मद्धम पड़ैत जा रहल अछि. साल-दर-साल इ सांस्कृतिक परंपरा कमजोर भेल जा रहल अछि. अखनो एहन बहुतो गाम छै जे एहि महत्वपूर्ण सांस्कृतिक कड़ी के बचा क' रखने अछि मुदा भविष्यक कड़ी टूटैत नजर अबैत अछि. नव पीढ़ी फाग गेबाक परंपरा सं दूर होइत जा रहल अछि. फिल्मी गीत आ फगुआ एलबम क' गीत पर हिनक उत्साह झलकैत अछि. संस्कृति प्रेमी लेल इ चिंताक विषय अछि.

लगभग एक मास धरि चलय वला फगुआ गीत ग्रामीणक टोली गामक पहिले सं निर्धारित दलान पर सभ सांझ मे जुटैत अछि. घर सं भोजन क' आबि लोक सब देर रात धरि फगुआ गीतक आनंद लैत रहैत छथि. एक मास धरि चलैत रहय वला एहि परंपराक समापन फगुआ दिन गीतक संग होइत छल. एहि अवधि मे नहिये टा नव पीढ़ी के गीतक अभ्यास करायल जाइत छल, हुनका डंफा बजेबाक कला सेहो सिखायल जाइत छल. एहि सं परंपरा एक पीढ़ी सं दोसर पीढ़ी धरि सहजे चलि जाइत छल मुदा जहिया सं इ कड़ी कमजोर भेल अछि, युवाक टोली सेहो एहि सं दूर होइत गेल. स्तरीय आ जीवनक सभ रंग के सहेजनाहर फगुआ गीतक बोल आब कम्मे सुनाई दैत अछि.

अखन सुनु इ फाग सुनील मल्लिक के आवाज मे.

Friday, February 17, 2017

मुजफ्फरपुर आ पूर्णिया लगाएत पांच ठाम बनत पासपोर्ट सेवा केंद्र

पूर्णिया, गोपालगंज, मुजफ्फरपुर, भागलपुर आ सिवान में खुजत नव पासपोर्ट सेवा केंद्र, विदेश मंत्री सुषमा स्वराज ट्वीट क' देलनि जनतब.
जानकारी लेल बता दी जे बिहार मे एहि सं पहिले पटना आ दरभंगा टा में पासपोर्ट सेवा केंद्र काज क' रहल अछि. आब बिहार मे सात टा पासपोर्ट केंद्र भ' जाएत. पासपोर्ट क' मांग में भारी वृद्धि होइत देखि विदेश मंत्रालय सभ राज्य मे पासपोर्ट सेवा केंद्रक संख्या बढ़ा रहल अछि.

Sunday, January 29, 2017

भारत रंग महोत्सव, दिल्ली में मंचित होएत मैथिली नाटक 'आबि मानि जाउ'

नई दिल्ली : मैथिली 19म भारत रंग महोत्सवमे मे लगातार दोसर बेर पहुंच गेल अछि.

पिछला बरख भारत रंग महोत्सव मे मैलोरंग जानकी परिणय' क' मंचन केने छल जे सियाराम विवाह (कथा-संकीर्तन) पर केन्द्रित छल.

एनएसडी साइट सं साभार
16 फरवरी कें मैथिली लोकरंग (मैलोरंग) मैथिली नाटक 'आबि मानि जाउ' क' मंचन प्रकाश झा क' निर्देशन मे होएत. 'आब मानि जाउ' अनिल चंद्र ठाकुर द्वारा लिखल गेल अछि. इ एकटा एहन युवतीक संघर्ष-गाथा अछि जे अपन लगनसं जिनगी बदलैत अछि. नाटकक' प्रस्तुति राष्ट्रीय नाट्य विद्यालय, मंडी हाउस, नई दिल्ली मे होएत. नाटक करीब सवा घंटाक अछि.

एहि लिंक पर जा अहां टिकट ऑनलाइन बुक क' सकैत छी.

Saturday, January 28, 2017

फगुआ मे संभावित भीड़ ल' रेलवे चलाओत बरौनी आ दरभंगा सं दिल्ली लेल स्पेशल ट्रेन

दरभंगा/बरौनी : फगुआ आ गर्मी क समय में संभावित बेसी भीड़ के देखैत भारतीय रेलवे दिल्ली-बरौनी आ दिल्ल्ली-दरभंगा एसी एक्सप्रेस ट्रेन क' परिचालन शुरू करत.



दिल्ली-बरौनी एसी स्पेशल एक्सप्रेस 

नई दिल्ली आ बरौनी क' बीच 3 मार्च सं 1 जुलाई धरि इ ट्रेन चलत. 04404 दिल्ली सं बरौनी लेल सभ शुक्र आ मंगल दिन सांझक 7:25 बजे खुजत आ अगिला दिन सांझ 6:50 बजे बरौनी पहुंचत. आपसी मे इ गाड़ी 04403 बरौनी सं दिल्ली लेल सभ बुध आ शनि दिन रातिक 9:35 बजे खुजि अगिला दिन रातिक 10:10 दिल्ली बजे पहुंचत.

हाजीपुर रेलवे के ट्वीट देखी.

दिल्ली-दरभंगा एसी स्पेशल एक्सप्रेस 

नई दिल्ली आ दरभंगा क' बीच 2 मार्च सं 30 जून धरि इ ट्रेन चलत. 04406 दिल्ली सं दरभंगा लेल सभ बृहस्पति आ सोम दिन भोरे 11:15 बजे खुजत आ अगिला दिन भोरे 9:30 बजे दरभंगा पहुंचत. आपसी मे इ गाड़ी 04405 दरभंगा सं दिल्ली लेल सभ शुक्र आ मंगल दिन दुपहरिया 12 बजे खुजि अगिला दिन दुपहरियाक 12:40 बजे दिल्ली पहुंचत.

Sunday, January 15, 2017

विश्व पुस्तक मेला, दिल्ली क' अंतिम सत्र मैथिलीक नाम रहल

नई दिल्ली : विश्व पुस्तक मेला नई दिल्ली 2017क आइ अंतिम दिन एकटा सत्र मैथिलीक नाम रहल जाहि मे मिथिलाक बौद्धिक-साहित्यिक परंपरा मे स्त्री लेखन विषय पर विमर्श कयल गेल. बताबी जे एहि बेरुक पुस्तक मेलाक प्रसंग ‘मानुषी’ छल जाहि मे खूब रास महिला साहित्य पर चर्चा-परिचर्चा भेल अछि.

बायां कात सं डॉ उषाकिरण खान, डॉ नीरजा रेणु, डॉ शेफालिका वर्मा आ धीरेन्द्र प्रेमर्षि


आजुक एहि विमर्श मे वक्ता छलथि डॉ उषाकिरण खान, डॉ शेफालिका वर्मा आ डॉ नीरजा रेणु. (जानकारी लेल बता दी जे इ तीनू लेखिका साहित्य अकादमी पुरस्कार सं सम्मानित छथि.) कार्यक्रमक सञ्चालन धीरेन्द्र प्रेमर्षि आ धन्यवाद ज्ञापन सविता झा आ अमित आनंद केलनि. एहि कार्यक्रमक ठीक बाद पत्रकार पुष्यमित्र क’ नव किताब “रेडियो कोसी” लोकार्पित भेल. कार्यक्रम मे दिल्ली-एनसीआर सं बहुतो मैथिल पहुंचल छलथि.

Wednesday, December 21, 2016

बड़की काकी एट हॉटमेल डॉट कॉम कें भेटल साहित्य अकादमी पुरस्कार

नई दिल्ली/दरभंगा : साहित्य अकादमी आइ साहित्य अकादमी पुरस्कार 2016क घोषणा क' देलक. साहित्य अकादमीक मैथिलीक पुरस्कार 2016 श्याम दरिहारे कें खिस्सा 'बड़की काकी एट हॉटमेल डॉट कॉम' लेल भेटल.

जूरी छलथि भगवान जी चौधरी, रूपनारायण चौधरी आ देवेंद्र चौधरी. साहित्य अकादमीक पुरस्कारक रुपे श्याम दरिहरे कें एक लाख रूपया, शॉल, आ ताम्रपत्र देल जाएत. इ पुरस्कार 22 फरवरी कें नई दिल्ली में आयोजित सम्मान समारोह मे देल जाएत. श्याम दरिहारे कें भेटल पुरस्कार सं साहित्य प्रेमी सभ खुश छथि, मिथिला प्राइम दिस सं ढाकी भरि बधाई.

Saturday, August 20, 2016

मैथिली के भेटय दोसर राजभाषा क' दर्जा

रांची : रांची : विद्यापतिस्मारक समितिक सदस्य पांच सूत्री मांग ल' झारखंड राजभवन मे राज्यपाल द्रौपदी मुर्मू सन भेंट केलनि. सदस्य सभ बिहार जेंका झारखंड मे सेहो मां जानकीक जन्मदिवस पर राज मे अवकाशक मांग केलनि. मैथिली के दोसर राजभाषाक दर्जा भेटय, हटिया-रांची सं जयनगर ट्रेन प्रतिदिन चलय क' मांग केलनि.

 संगहि मैथिली अकादमीक गठन होइ, जेपीएससी में मैथिली भाषा जोड़ल जाइ क' मांग केलनि. राज्यपाल सं भेंट करब लेल लेखानंद झा, अमरेंद्र मोहन, मोहम्मद परवेज, श्रेष्ठ नारायण झा, बच्चा राम आदि पहुंचल छलथि. इ जनतब प्रवक्ता ज्ञानदेव झा देलनि.

Saturday, July 9, 2016

LNMU क' उपकेंद्र बेगूसराय मे खुजबाक बाट साफ, 12 जुलाई के शिक्षा मंत्री करता उद्घाटन

ललित नारायण मिथिला विश्वविद्यालय क' उपकेंद्र बेगूसराय मे खुजबाक बाट साफ

बेगूसराय : बेगूसराय मे ललित नारायण मिथिला विश्वविद्यालय क' उपकेंद्र खोजबाक बात साफ भ' गेल अछि. 12 जुलाई के बिहार सरकारक शिक्षा मंत्री डॉ अशोक चौधरी एहि उपकेंद्रक उद्घाटन जीडी कॉलेज परिसर मे करता ताहि लेल तयारी अंतिम चरण में अछि. बता दी जे बेगूसराय मे मिथिला विश्वविद्यालयक उपकेंद्र खुजय ताहि लेल पिछले कतेको बरख सं छात्र संगठन मांग क' रहल छल.


बेगूसराय नगर विधायक बनलाक बाद अमिता भूषण सेहो एहि मुद्दा के सदन मे उठा क' एकरा पूरा करबाक मांग केने छलथि. राज सरकार आ विश्वविद्यालय एहि दिशा मे देग उठबैत जिलाक हजारों छात्रक मांग के पूरा केलक अछि. बेगूसराय मे मिथिला विश्वविद्यालयक उपकेंद्र हेबा सं आब प्रतिदिन दरभंगा जा काज कार्य लेल एतुक्का धिया-पता के आब काम परेशानी होएत.

सौराठ सभा 14 जुलाई धरि

मधुबनी : भूमि आ राजस्व मंत्री मदन मोहन झा सौराठ सभा क' उद्घाटन करैत कहला जे सौराठ सभाक उत्थान आ विकासक लेल सभ संभव प्रयास कयल जा जाएत. ओतहि मिथिला पेंटिंग लेल क्षेत्र मे मुख्यमंत्री नीतीश कुमार द्वारा कयल गेल घोषणाक संदर्भ मे अपना स्तर सं जिला समाहर्ता के जल्दिये जमीन उपलब्ध करेबाक गप्प कहलनि. डॉ झा बीतल शुक्र कें एहि बरख सात दिन धरि चलय वला वैवाहिक निर्धारण स्थल सौराठ सभाक उद्घाटन कार्यक्रम के संबोधित क' रहल छलथि. डॉ झा कहलनि जे सौराठ सभाक पूरा विकास कयल जाएत.


कामेश्वर सिंह दरभंगा संस्कृत विश्वविद्यालयक कुलपति देवनारायण झा कहलनि जे सौराठ सभाक इतिहास सात सौ बरख पुरान अछि, एतहि पंजी प्रथाक पैघ परंपरा रहल अछि. महराज हरिदेव सिंहक समय सं पंजी प्रथा लागू कयल गेल जे आब वैज्ञानिक स्तर पर सेहो प्रमाणित कयल गेल अछि. सौराठ सभाक अस्तित्व के बचबा लेल सरकार आ समाजक लोक कें आगू आबय पड़तय तखने धरोहर संरक्षित रहि सकत. मौका पर बहुतो वक्ता अप्पन बात रखला आ हुनक सभक एक्के उद्देश्य छल जे सौराठ सभ संरक्षित रहि सकय.

बता दी जे एहि ठाम (सौराठ सभा) आदि कालसं मैथिला ब्राह्मण अपन धिया लेल सुयोग्य वर तकबा लेल अबै छथि.